म्याड्रिड । मोरक्कोबाट हजारौँ आप्रवासीहरू बिहीबार पौडी खेलेर उत्तर अफ्रिकास्थित स्पेनको स्वायत्त क्षेत्र सेउटा प्रवेश गरेपछि स्पेन सरकारले सुरक्षा व्यवस्था सुदृढ बनाउन सेना परिचालन गर्ने निर्णय गरेको छ।
सेउटा पुग्ने प्रयासका क्रममा कम्तीमा १५ जनाको डुबेर मृत्यु भएको छ। पछिल्ला दिनहरूमा अवैध रूपमा सीमा पार गर्ने प्रयास बढेपछि स्थानीय अधिकारीहरूले यसअघि नै म्याड्रिडसँग सहयोगको अपिल गरेका थिए। तर बिहीबार सीमा नियन्त्रण प्रणाली नै विफल भएजस्तो देखिने अवस्था सिर्जना भएपछि स्थिति थप जटिल बनेको हो।
यसै महिनाको सुरुआतमा स्पेनको सर्वोच्च अदालतले समुद्रमार्फत सेउटा वा अर्को स्पेनी क्षेत्र मेलिल्ला प्रवेश गर्ने प्रयासका क्रममा रोकिएका आप्रवासीलाई तत्कालै मोरक्को फर्काउन नपाइने फैसला गरेको थियो।
स्पेनको गृह मन्त्रालयले उक्त निर्णयलाई मानव तस्करीका गिरोहहरूले दुरुपयोग गर्दै कागजातविहीन आप्रवासीलाई सीमा पार गर्न प्रोत्साहन दिएको आरोप लगाएको छ।
गृह मन्त्रालयले जारी गरेको वक्तव्यमा भनिएको छ, “सेउटा शहरको सुरक्षा कायम राख्न र सिभिल गार्डलाई आवश्यक सहयोग गर्न सशस्त्र बल परिचालन गरिनेछ।”
मोरक्कोको उत्तरी तटमा रहेको सेउटा जिब्राल्टर जलडमरूमध्यपारि मुख्यभूमि स्पेनसँग जोडिएको स्पेनी स्वायत्त क्षेत्र हो। युरोप प्रवेश गर्न खोज्ने आप्रवासीहरूका लागि यो लामो समयदेखि प्रमुख प्रवेशद्वारका रूपमा रहँदै आएको छ।
यस घटनापछि इटाली सरकारले पनि स्पेनसँग रहेको खुला सीमा व्यवस्था (सेन्गेन सम्झौता) अस्थायी रूपमा बन्द गर्ने लगायतका असाधारण उपायहरू अपनाउने सम्भावनाबारे विचार गरिरहेको जनाएको छ।
केही दिनयता सेउटा प्रवेश गर्ने प्रयास गर्ने आप्रवासीहरूको सङ्ख्या लगातार बढिरहेको थियो। बिहीबार भने हजारौँ मानिसले सीमाको काँक्रीट तटबन्धबाट समुद्रमा हाम फालेर सीमाचिन्ह रहेको जेटी वरिपरि पौडी खेल्दै स्पेनी क्षेत्रमा प्रवेश गरेका थिए।
स्पेनी तर्फका समुद्री किनारहरू रबरका ट्युब, लाइफ रिङ र फिन (खुट्टामा लगाइने पौडी उपकरण)ले भरिएका थिए। केही आप्रवासी सुरक्षित रूपमा पुगेपछि खुसी मनाइरहेका देखिए भने दर्जनौँले भने ज्यान गुमाए।
मोरक्कोबाट एकाएक यति ठूलो सङ्ख्यामा अवैध प्रवेश किन बढ्यो वा त्यहाँका सुरक्षा निकायले त्यसलाई रोक्न कति प्रयास गरे भन्ने अझै स्पष्ट भइसकेको छैन। एक स्पेनी अधिकारीका अनुसार केही समयका लागि सीमा नियन्त्रण पूर्ण रूपमा ध्वस्त भएको अवस्था थियो।
स्पेनका प्रधानमन्त्री पेद्रो सान्चेज शुक्रबार सेउटा पुग्ने कार्यक्रम रहेको छ। उनले अवस्था तत्काल सामान्य बनाउने प्रतिबद्धता जनाएका छन्।
सेउटाका आप्रवासी स्वागत केन्द्रहरू क्षमताभन्दा बढी भरिएका छन्। स्थानीय प्रशासनले केन्द्र सरकारले आवश्यक सहयोग उपलब्ध गराउन ढिलाइ गरेको आरोप लगाएको छ।
सेउटाका प्रमुख जुआन हेसुस भिभासले ठूलो सङ्ख्यामा आएका आप्रवासीका कारण स्थानीय स्रोत–साधनमाथि अत्यधिक दबाब परेको भन्दै स्पेन सरकारलाई तत्काल हस्तक्षेप गर्न आग्रह गरेका छन्।
यस घटनाले स्पेन र इटालीबीच राजनीतिक विवादसमेत निम्त्याएको छ। इटालीकी प्रधानमन्त्री जर्जिया मेलोनीले सामाजिक सञ्जाल एक्समार्फत सेउटाका दृश्यहरू “अत्यन्त चिन्ताजनक” भएको उल्लेख गर्दै अनियन्त्रित अवैध आप्रवासनले युरोपको सीमाको सुरक्षामाथि प्रत्यक्ष खतरा उत्पन्न गरेको बताएकी छन्।
उनको अभिव्यक्ति इटालीका विदेशमन्त्री एन्टोनियो तायानीले यसअघि दिएको प्रतिक्रियासँग मेल खान्छ। यद्यपि, यस्तो खुला सीमा व्यवस्था निलम्बन गर्ने प्रस्ताव व्यवहारमा कार्यान्वयन गर्न कठिन हुने विश्लेषण गरिएको छ। उता स्पेनका विदेशमन्त्री होसे लुइस अल्बारेसले भने तायानीले राजनीतिक लाभका लागि आप्रवासनको मुद्दालाई प्रयोग गरिरहेको आरोप लगाएका छन्।
अन्तराष्ट्रिय मिडियाको सहयोगमा
