काठमाडौं । अमेरिका र इरानबीचको युद्ध अन्त्यका लागि भइरहेको वार्ता निष्कर्षमा पुग्न नसकेपछि अमेरिकी राष्ट्रपति डोनाल्ड ट्रम्पले इरानविरुद्ध “अहिलेसम्मकै सबैभन्दा कडा आर्थिक कारबाही” को घोषणा गरेका छन्।
बुधबार ‘ट्रुथ सोसल’ मा पोस्ट गर्दै ट्रम्पले इरानले सम्झौता गर्ने मौका गुमाएको र अब उसले “अभूतपूर्वस्तरको आर्थिक युद्ध र नाकाबन्दी” को सामना गर्नुपर्ने बताएका छन्।
यसका साथै ट्रम्पले इरानसँग व्यापार गर्ने वा कुनै पनि प्रकारको सम्बन्ध राख्ने अन्य देशहरुलाई पनि प्रतिबन्ध लगाउने चेतावनी दिएका छन्।
“कुनै पनि देश जसले आफ्ना वित्तीय संस्था, व्यवसाय, विमानस्थल वा सरकारी निकायहरुलाई इरानका लागि सहारा बन्न दिन्छ, उसले आफैँ पनि गम्भीर आर्थिक परिणाम भोग्नुपर्नेछ,” उनले लेखेका छन्, “तेल तस्करी, रकम आदानप्रदान, नगद प्रवाह, एक्सचेन्ज हाउस, जहाज दर्ता, वा नक्कली कम्पनीहरु यी सबै कार्य तुरुन्तै रोकिनुपर्छ। तपाईंहरुको हुनुहुन्छ, तपाईंहरुलाई राम्रोसँग थाहा छ। यो एउटा ‘आर्थिक डी-डे’ हुनेछ, र इरानको खतरालाई अलग-थलग पार्न र परास्त गर्न हाम्रा सबै मित्रराष्ट्रहरु संयुक्त राज्य अमेरिकाको साथमा उभिनुपर्छ।”
ट्रम्पले इरानलाई आर्थिक प्रतिबन्धको चेतावनी दिएको यो पहिलो पटक भने होइन।
गत फेब्रुअरीमा अमेरिका-इजरायलले इरानविरुद्ध युद्ध सुरु गरेपछि ट्रम्प प्रशासनले ‘अपरेसन इकोनोमिक फ्युरी’ अन्तर्गत इरानमाथि निरन्तर आर्थिक दबाब बढाउँदै आएको छ।
अमेरिकाले यसअघि नै इरानको तेल, जलयातायात (सिपिङ) र वित्तीय क्षेत्रमा कडा प्रतिबन्ध लगाइसकेको छ, जसको मुख्य उद्देश्य इरानले ऊर्जा निर्यातबाट प्राप्त गर्ने आम्दानी रोक्नु हो। यसका साथै अमेरिकाले इरानी बन्दरगाहहरुमा समुद्री नाकाबन्दी लगाएको छ र विदेशमा इरानी तेल बिक्री गर्न सहयोग गरेको आरोपमा विभिन्न कम्पनी, बिचौलिया र ट्याङ्करहरुलाई निशाना बनाएको छ।
एजन्सी
