काठमाडौं । नेपाल प्रिमियर लिग अन्तर्गत कीर्तिपुरस्थित त्रिवि क्रिकेट मैदानमा भएको खेलमा जनकपुर बोल्ट्सले काठमाडौँ गोर्खाजलाई ८ विकेटले पराजित गरेको छ। काठमाडौँले प्रस्तुत गरेको ११६ रनको सामान्य विजय लक्ष्य जनकपुरले १७.२ ओभरमा २ विकेट गुमाउँदै पूरा गर्यो।
टस जितेर पहिले ब्याटिङ गरेको काठमाडौँ गोर्खाज १९.३ ओभरमा ११५ रनमा अलआउट भएको थियो। काठमाडौँका लागि भीम सार्कीले सर्वाधिक ३३ रन बनाए भने रसिद खानले १७, स्मित पटेलले १३ र सुमित महर्जनले १० रन जोडे।
जनकपुरका लागि बलिङतर्फ राहुल यादवले उत्कृष्ट प्रदर्शन गर्दै ४ विकेट लिए भने सैफ हसनले २ विकेट हात पारे। यसैगरी मोइन अली, हरमीत सिंह र ललित राजवंशीले १-१ विकेट लिएका थिए।
सामान्य लक्ष्य पछ्याउने क्रममा जनकपुर बोल्ट्सले संयमित ब्याटिङ गर्दै १७.२ ओभरमा २ विकेटको क्षतिमा ११६ रन बनाएर सहज जित हात पारेको हो। यस जितसँगै जनकपुरले प्रतियोगितामा आफ्नो उत्कृष्ट प्रदर्शनलाई निरन्तरता दिएको छ।
