काठमाडौं । सिद्धार्थ प्रिमियर इन्स्योरेन्स लिमिटेड (एसपीआइएल) ले नेपाल बीमा प्राधिकरणबाट स्वीकृति प्राप्त गरी दुई नयाँ बीमा योजनाहरू (एसपीआइएल) विद्यार्थी सुरक्षा र एसपीआइएल लघु, साना तथा मझौला क्षेत्रलाई लक्षित मेडि सुरक्षा प्लस (एमएसएमइएस) बजारमा ल्याएको छ। समाजका महत्वपूर्ण क्षेत्रहरूमा बीमाको पहुँच विस्तार गर्दै विद्यार्थी, शैक्षिक संस्था तथा लघु, साना र मझौला उद्यम (MSMEs) क्षेत्रलाई आर्थिक सुरक्षा प्रदान गर्ने उद्देश्यका साथ यी योजनाहरू सार्वजनिक गरिएका हुन्।
एसपीआइएल विद्यार्थी सुरक्षा (SPIL Vidhyarthi Suraksha )विद्यालय, कलेज तथा अन्य शैक्षिक संस्थाहरूमा अध्ययनरत ३ देखि ४० वर्ष उमेर समूहका विद्यार्थीहरूलाई लक्षित गरी तयार गरिएको सामूहिक बीमा योजना हो। यस योजनाले दुर्घटनाबाट उत्पन्न हुने जोखिम, तोकिएका चिकित्सा खर्च तथा निश्चित प्रकारका गम्भीर रोगहरू विरुद्ध आर्थिक सुरक्षा प्रदान गर्दछ। यसका अतिरिक्त, प्रस्ताव फाराममा उल्लेख गरिएका अभिभावक वा कानुनी संरक्षकको दुर्घटनाका कारण मृत्यु भएमा वा स्थायी पूर्ण अशक्तता भएमा विद्यार्थीको अध्ययनलाई निरन्तरता दिन सहयोग पुर्याउने उद्देश्यले शैक्षिक निरन्तरता सुविधा समेत समावेश गरिएको छ।
एसपीआइएल लघु, साना तथा मझौला क्षेत्रलाई लक्षित मेडि सुरक्षा प्लस (एमएसएमइएस) मुख्यतः लघु, साना तथा मझौला उद्यम (MSMEs) क्षेत्रलाई लक्षित गरी तयार गरिएको निश्चित लाभमा आधारित स्वास्थ्य बीमा योजना हो। यस योजनाअन्तर्गत १८ देखि ६५ वर्ष उमेर समूहका बीमित व्यक्तिहरूलाई तोकिएका चिकित्सा खर्च, स्वास्थ्यसम्बन्धी जोखिम तथा निश्चित प्रकारका गम्भीर रोगहरू (Critical Illnesses) विरुद्ध आर्थिक सुरक्षा प्रदान गरिन्छ। यसले कर्मचारी तथा अन्य बीमित व्यक्तिहरूको स्वास्थ्य सुरक्षामा सहयोग पुर्याउनुका साथै अप्रत्याशित स्वास्थ्य उपचारका कारण उत्पन्न हुन सक्ने आर्थिक भारलाई कम गर्न मद्दत गर्दछ।
यी दुवै बीमा योजनामा निश्चित प्रकारका गम्भीर रोगहरूलाई समेत समेटिनुले स्वास्थ्यसम्बन्धी अप्रत्याशित जोखिमको समयमा बीमित व्यक्ति तथा उनीहरूको परिवारलाई थप आर्थिक सुरक्षा प्रदान गर्ने विश्वास कम्पनीले लिएको छ।
यी नयाँ बीमा योजनाहरूको सुरुवातसँगै एसपीआइएल ले बीमाप्रतिको जनचेतना र विश्वास अभिवृद्धि गर्ने, बीमा सुरक्षाको पहुँच विस्तार गर्ने तथा शैक्षिक संस्था र लघु, साना तथा मझौला उद्यम क्षेत्रका बदलिँदा आवश्यकतालाई सम्बोधन गर्ने लक्ष्य लिएको छ। यी पहलहरूले बीमालाई अझ सहज, समावेशी र अर्थपूर्ण बनाउँदै सुरक्षित तथा आर्थिक रूपमा सुदृढ समाज निर्माण गर्ने कम्पनीको प्रतिबद्धतालाई पुनः पुष्टि गर्दछन्।
