काठमाडौं । काठमाडौं महानगरपालिकाका प्रमुख प्रशासकीय अधिकृत सरोज गुरागाईं बिहीबार कार्यालय प्रवेश गर्ने क्रममा विवाद उत्पन्न भएको छ। मेयर बालेन्द्र शाह (बालेन) को अडानअनुसार गुरागाईंलाई कार्यालय प्रवेशमा रोक्ने प्रयास गरिए पनि कर्मचारीहरूको दबाबका कारण उनी कार्यालयभित्र प्रवेश गर्न सफल भए।
महानगर प्रहरीले गुरागाईंलाई कार्यकक्षमा प्रवेश गर्न रोक्ने प्रयास गरेको थियो। स्थिति तनावपूर्ण बन्दा ठूलो संख्यामा नगर प्रहरी परिचालन गरिएको थियो। तर, सयौंको संख्यामा भेला भएका कर्मचारीहरूले प्रमुख प्रशासकीय अधिकृतको पक्षमा उभिँदै उनलाई कार्यालय भवनभित्र प्रवेश गराए।
कर्मचारीहरूले लामो समयदेखि तलब नपाएको भन्दै आक्रोश पोखेका थिए। उनीहरूले प्रशासनिक कामकाज प्रभावित भएको भन्दै गुरागाईंलाई काम गर्न दिनुपर्ने माग गरेका थिए।
महानगरपालिकाको कार्यालय प्रवेश गरे पनि गुरागाईंको कार्यकक्षको ढोकामा ताला लगाइएको थियो। ताला खोल्ने प्रयास गरिए पनि सम्भव नभएपछि आक्रोशित कर्मचारीहरूले ढोकाको शीशा फुटाएका थिए।
यसबीच, नगर प्रमुख राजु पाण्डे पुगेपछि स्थिति केही नियन्त्रणमा आएको थियो। उनले आन्दोलनरत कर्मचारीहरूलाई पछाडि हट्न आग्रह गरे।
गुरागाईं ०८१ पुस १४ गतेदेखि निलम्बनमा छन्। मेयर शाहले उनीविरुद्ध कारबाही गर्दै उनलाई निलम्बन गरेका थिए। आरोप छ कि उनले काठमाडौं टावरलाई १२ तला बाट १९ तलासम्मको स्वीकृति दिएका थिए, जसका कारण उनीमाथि छानबिन प्रक्रिया अघि बढाइएको हो।
महानगरले उनीमाथि छानबिन गर्न तीनवटा समिति गठन गरेको थियो। तर, संघीय मामिला तथा सामान्य प्रशासन मन्त्रालयले गुरागाईंलाई पुनः कार्यालयमा फर्काउने निर्देशन दिँदै आएको छ।
काठमाडौं महानगरपालिकाले संघीय सरकारसँग पटक–पटक नयाँ प्रमुख प्रशासकीय अधिकृतको माग गर्दै आएको छ। तर, मन्त्रालयको निर्देशनअनुसार गुरागाईंलाई नै काममा फर्कन दिनुपर्ने पक्षमा केही कर्मचारीहरू उभिएका छन्।
