काठमाडौं । काठमाडौं महानगरपालिकाका प्रमुख प्रशासकीय अधिकृत सरोज गुरागाईँलाई तीन महिना १४ दिनपछि कार्यालय प्रवेश गराइएको छ। उपप्रमुख सुनिता डंगोल तथा कार्यपालिका सदस्यहरूको उपस्थितिमा ताला फोडेर उनलाई कार्यकक्षमा प्रवेश गराइएको हो।
संघीय मामिला तथा सामान्य प्रशासन मन्त्रालयले गुरागाईँलाई कार्यालय हाजिर गराउने वातावरण बनाउन आग्रह गर्दै एक महिना अघि पत्र पठाएको थियो। सोही निर्देशनअनुसार उनले आज कार्यालय पुगेका हुन्।
गुरागाईँको पुनः कार्यालय प्रवेशलाई लिएर महानगरपालिका प्रशासनमा विवाद चुलिएको देखिन्छ। उपप्रमुख डंगोलले मेयर बालेन साहलाई कार्यालयमा उपस्थित भएर समस्या समाधान गर्न सुझाव दिएकी थिइन्। तर, मेयर साहले गुरागाईँलाई रोक्न नगरप्रहरी परिचालन गरेका थिए। नगरप्रहरीको अवरोध पार गर्दै गुरागाईँ कार्यकक्षमा छिर्न सफल भएका हुन्।
महानगरका कर्मचारीहरूले लामो समयदेखि मेयर साहले व्यक्तिगत ‘इगो’ का कारण प्रमुख प्रशासकीय अधिकृतलाई कार्यालय प्रवेशमा रोक लगाउँदै तलब समेत रोक्का गरेको आरोप लगाएका छन्।
गुरागाईं ०८१ पुस १४ गतेदेखि निलम्बनमा छन्। मेयर शाहले उनीविरुद्ध कारबाही गर्दै उनलाई निलम्बन गरेका थिए। आरोप छ कि उनले काठमाडौं टावरलाई १२ तला बाट १९ तलासम्मको स्वीकृति दिएका थिए, जसका कारण उनीमाथि छानबिन प्रक्रिया अघि बढाइएको हो।
महानगरले उनीमाथि छानबिन गर्न तीनवटा समिति गठन गरेको थियो।
