निफ्राको ऋणपत्रमा आवेदन दिने म्याद फेरि थपियो

यसअघि जेठ १८ गतेदेखि निष्कासन सुरू भएको उक्त ऋणपत्रमा आवेदन दिने अन्तिम म्याद पहिलो चरणमा जेठ २१ तोकिएको थियो । तर सोही दिन उपत्यकामा सार्वजनिक बिदा परेकाले म्याद एक दिन बढाएर जेठ २२ कायम गरिएको थियो । पछिल्लो सूचना अनुसार, बैंकले पुनः आवेदन दिने अवधि थप गर्दै जेठ २५ सम्मका लागि खुला राखेको छ ।

बैंकले प्रतिऋणपत्र रु १,००० अंकित दरमा ५० लाख कित्ता ऋणपत्र बजारमा ल्याएको हो । जसमा ३० लाख कित्ता व्यक्तिगत तवरबाट बिक्री गरिनेछ भने बाँकी २० लाख कित्तामध्ये १ लाख कित्ता सामूहिक लगानी कोषका लागि छुट्याइएको र १९ लाख कित्ता सर्वसाधारणका लागि खुला गरिएको हो ।

सात वर्षे अवधिका साथै वार्षिक ६ प्रतिशत निश्चित ब्याजदर रहने यस ऋणपत्रमा न्यूनतम २५ कित्ता र अधिकतम १० लाख कित्तासम्म आवेदन दिन सकिने व्यवस्था गरिएको छ ।

ऋणपत्रको निष्कासन तथा बिक्री व्यवस्थापनको जिम्मा एनआईएमबी एस क्यापिटल लिमिटेडले लिएको छ । यस ऋणपत्रलाई नेपाल धितोपत्र बोर्डले वैशाख ३० गते स्वीकृति प्रदान गरिसकेको हो ।