काठमाडौं । जीवन बीमा कम्पनीहरुको पोलिसी सरेण्डर रकम रकम पछिल्लो समय घट्दै गएको छ । बीमा प्राधिकरणको तथ्यांक अनुसार चालु आर्थिक वर्षको पुस मसान्तसम्मको अवधिमा पोलिसी सरेण्डर बापतको रकम २३.७७ प्रतिशतले घटेको हो ।
नेपालमा सञ्चालित रहेका जीवन बीमा कम्पनीहरुबाट चालु आर्थिक वर्षको पुस महिनासम्ममा सरेण्डरमार्फत साढे ५ अर्बबढी रुपैयाँ बाहिरिएको छ । नेपाल बीमा प्राधिकरणले सार्वजनिक गरेको तथ्यांक अनुसार चालु आवको दोस्रो त्रैमास अर्थात पुस महिनासम्ममा जीवन बीमा कम्पनीहरुबाट ५ अर्ब ६९ करोड २१ लाख रुपैयाँ बाहिरिएको छ । यो रकम गत आवको सोही अवधिसम्मको तुलनामा २३.७७ प्रतिशत कम हो । गत आवको पुस महिनासम्म जीवन बीमा कम्पनीहरुबाट पोलिसी सरेण्डरमार्फत सात अर्ब ४६ करोड ६६ लाख रुपैयाँ बाहिरिएको थियो ।
सरेण्डर रकमसँगै बीमालेख त्याग गर्नेको संख्या पनि गत आवको तुलनामा घटेको छ । गत आवको पुस महिनासम्म ५४ हजार ४१४ जनाले बीमालेख सपर्मण गरेकोमा चालु आवको पुस महिनासम्म भने ५१ हजार ०७७ जनाले मात्रै पोलिसी समर्पण गरेका छन् । यस हिसाबमा बीमालेख समर्पण संख्या ६.१४ प्रतिशतले घटेको छ ।
त्यस्तै, जीवन बीमकहरुमा व्यतित बीमालेख रकम (नविकरण नगरिएको रकम) भने ४.५३ प्रतिशतले बढेको छ । गत आवको पुस महिनासम्ममा बीमालेख नविकरण नगरिएको रकम ३६ अर्ब १६ करोड ८९ लाख रुपैयाँ रहेकोमा चालु आवको सो अवधिसम्म ३७ अर्ब ८० करोड ७६ लाख रुपैयाँ रहेको छ । यता व्यतित बीमालेखको संख्या पनि ०.१७ प्रतिशत बढेर १२ लाख ३१ हजार ६५० वटा पोलिसी नविकरण भएका छैनन् । गत आवको सोही अवधिसम्म यस्तो संख्या १२ लाख २८ हजार ५०६ रहेका थिए ।
जीवन बीमा कम्पनीहरुमा पोलिसी सरेण्डरदर कम भएपनि व्यतित भएका बीमालेख संख्या र रकम बढ्दै गइरहेको छ । यस्तो दर बढ्दै जाँदा बीमा कम्पनीहरुको व्यवसायमा प्रतिकुल असर पार्ने देखिन्छ । नियामक निकाय नेपाल बीमा प्राधिकरण, जीवन बीमा कम्पनी र अभिकर्ताहरुको अथक प्रयास र जनचेतनाका कारण पोलिसी सरेण्डरदर घट्न सफल भएको छ । केही समययता पोलिसी सरेण्डरको अवस्था भयाभह रहेको थियो ।
