काठमाडौं । फोक्सवागनले आफ्नो नाफा सन् २०१६ पछिको सबैभन्दा कम स्तरमा झरेपछि जर्मनीमा सन् २०३० सम्म ५० हजार रोजगारी कटौती गर्ने जनाएको छ । कम्पनीका प्रमुख कार्यकारी अधिकृत Oliver Blume ले शेयरधारकहरूलाई बताएअनुसार यो कटौती जर्मनीमै हुनेछ र कम्पनी समूहका सबै ब्रान्डहरूमा लागू हुनेछ । जसमा Audi र Porsche पनि समावेश छन्।
युरोपको सबैभन्दा ठूलो कार निर्माता फोक्सवागनले सन् २०२५ मा करपछि प्राप्त हुने नाफा करिब ४४% ले घटेको जनाएको छ । कम्पनीका अनुसार यो गिरावटको कारण अमेरिकाले लगाएको आयात कर (ट्यारिफ), चीनबाट बढ्दो प्रतिस्पर्धा र विद्युतीय सवारी (EV) तर्फ रूपान्तरण गर्दा लागेको उच्च पुनर्संरचना खर्च रहेको छ।
कम्पनीले आगामी वर्षमा सुधार हुने अनुमान गरे पनि यसको वित्त प्रमुखले खर्च कडाइका साथ घटाउनुपर्ने बताएका छन् । कम्पनीको वार्षिक प्रतिवेदनमा शेयरधारकहरूलाई पठाइएको पत्रमा CEO ब्लुमले लेखेका छन्: “जर्मनीमा फोक्सवागन समूहअन्तर्गत २०३० सम्म करिब ५० हजार रोजगारी कटौती हुने अपेक्षा गरिएको छ।” उनले थपे, “हामी अहिले बिल्कुलै फरक प्रकारको व्यावसायिक वातावरणमा काम गरिरहेका छौं।”
यसअघि नै कम्पनीले श्रमिक संघहरूसँग सम्झौता गरेर २०३० सम्म ३५ हजार भन्दा बढी रोजगारी सामाजिक रूपमा जिम्मेवार तरिकाले घटाउने सहमति गरिसकेको छ, जसबाट करिब १५ अर्ब युरो बचत गर्ने लक्ष्य राखिएको छ । फोक्सवागन सहित अन्य जर्मन कार निर्माताहरू पनि चीनमा कारको माग घट्नुका कारण प्रभावित भएका छन्, जबकि चीन पहिले उनीहरूको ठूलो बजार थियो ।
यसैबीच चिनियाँ कार ब्रान्डहरू युरोपेली बजारमा प्रवेश गर्दै गएकाले प्रतिस्पर्धा अझ बढेको छ । अर्कोतर्फ, अमेरिकी राष्ट्रपति डोनल्ड ट्रम्पले कार आयातमा २५% ट्यारिफ लगाउने निर्णय गरेपछि अवस्था अझ कठिन भएको कम्पनीले जनाएको छ । कम्पनीका वार्षिक तथ्यांकअनुसार फोक्सवागनको करपछिको खुद नाफा १२.४ अर्बबाट घटेर ६.९ अर्ब युरो पुगेको छ।
सन् २०२६ का लागि कम्पनीले ४% देखि ५.५% को मुख्य नाफा मार्जिन रहने अनुमान गरेको छ, जुन यस वर्षको ४.६% भन्दा पनि कम हुन सक्ने बताइएको छ । फोक्सवागनका वित्त प्रमुख Arno Antlitz ले कम्पनीको हालको नाफा मार्जिन दीर्घकालमा पर्याप्त नभएको चेतावनी दिएका छन्। उनले भने, “यदि हामीले खर्चलाई कडाइका साथ घटाउँदै लगे मात्र लक्ष्य पूरा गर्न सक्छौं । आगामी महिनाहरूमा हामी यही विषयमा केन्द्रित हुनेछौं ।”
