काठमाडौं । मध्य इजरायलको मोशाव अदानीममा एक विदेशी कामदार इरानी मिसाइल आक्रमणमा मारिएका छन् भने दक्षिणी वेस्ट ब्यांकमा तीन प्यालेस्टिनी महिला मारिएका छन् । बिहीबार राति र बिहानसम्म इजरायलका विभिन्न शहरमा छ पटक मिसाइल चेतावनी बजेको र उत्तरी इजरायल आक्रमणको मुख्य केन्द्र बनेको द टाइम्स अफ इजरायलले जनाएको छ ।
मोशाव अदानीममा मृत्यु हुने विदेशी कामदार ३० वर्षका थिए । उनमा क्लस्टर बमको स-सानो टुक्राबाट गम्भीर चोट लागेका थिए र केही समयपछि उनको मृत्यु भएको माजन डेविड अडोम एम्बुलेन्स सेवाले जनाएको छ।
वेस्ट बैंकको हेब्रोन नजिकको बेइट अव्वा गाउँमा तीन महिलाहरू—सहिरा, अमल र मेइस मसाल्मा—इरानी क्लस्टर बमको प्रहारमा मारिएका हुन्। उनीहरूको उमेर क्रमश: ५०, ३६ र १७ वर्ष थियो । यसै घटनामा १३ अन्य व्यक्ति घाइते भएका छन्, जसमा दुईको अवस्था गम्भीर छ।
अर्को क्लस्टर बम मिसाइलबाट इजरायलको समुदायमा प्रहार भई घर क्षतिग्रस्त भएको छ, तर मानवीय क्षति भने भएन। मिसाइल प्रहारको चेतावनी बीर्सेबा नजिकका धेरै गाउँमा बजाइएको थियो। केही मिसाइलहरूले टेल अविभमा पनि प्रहार गरेका छन्, जसले आवासीय भवनमा व्यापक क्षति पुर्याएको छ र एक व्यक्तिलाई हल्का चोट लागेको छ।
पहिले बुधबार मध्य इजरायलको पेताह टिभ्का क्षेत्रमा अर्को इरानी मिसाइल प्रहारमा ४४ वर्षका पुरुष र १३ तथा १२ वर्षका दुई बालबालिका हल्का घाइते भएका थिए। हालसम्म इजरायलमा प्रहार भएका मिसाइलमध्ये करिब आधा क्लस्टर बम भएको इजरायली सेनाले जनाएको छ।
इरानले इजरायलमाथि क्लस्टर बम प्रहार गरेको स्वीकार गरेको छ र यसको उद्देश्य इजरायलले इरानी सुरक्षा प्रमुख अली लारिजानीको हत्या गरेको प्रतिशोध लिनु रहेको बताएको छ।
त्यसैबीच, इरान समर्थित हिज़्बुल्लाहले पनि इजरायलमाथि आक्रमण गरेको छ। उनीहरूले गाजा सिमाना क्षेत्रमा रकेट प्रहार गरेका छन्, जुन लेबननबाट करिब २०० किलोमिटर दूरीमा छ ।
इजरायली सेनाका अनुसार हिज़्बुल्लाहले मध्य इजरायल र गालिल क्षेत्रमा केही प्रक्षेपण गरिसकेको छ, तर ती मिसाइलहरू रोकिएका वा खुला क्षेत्रमा खसेका थिए ।
