काठमाडौं । कोलम्बियामा पछिल्ला केही वर्षयताकै शक्तिशाली भूकम्प गएपछि कम्तीमा १३२ जनाको मृत्यु भएको छ भने सरकारले आपत्कालीन अवस्था घोषणा गरेको छ।
भत्किएका भवनमा अझै मानिसहरू पुरिएको आशंका गरिएकाले मृतकको संख्या अझै बढ्न सक्ने बताइएको छ।
कोलम्बियाको भूगर्भसम्बन्धी सेवाका अनुसार स्थानीय समयअनुसार बिहान ७ः३४ बजे चोको प्रान्तमा ७.४ म्याग्निच्युडको भूकम्प गएको हो। भूकम्पको केन्द्रविन्दु १०३ किलोमिटर (६४ माइल) गहिराइमा रहेको थियो। पश्चिमी कोलम्बियाका सयौँ माइलसम्म फैलिएको विशाल क्षेत्रमा भूकम्पको धक्का महसुस गरिएको थियो।
मृत्यु हुनेमध्ये अधिकांश कोलम्बियाको कफी उत्पादन क्षेत्रको प्रमुख सहर पेरेरियामा रहेका छन्। आसपासका सहर तथा भाये देल काउका क्षेत्रमा पनि भूकम्पले ठूलो क्षति पुर्याएको छ।
भूकम्पको केन्द्रविन्दु चोको प्रान्तको सान होसे देल पाल्मार गाउँनजिकै रहेको थियो। तर स्थानीय मेयर लेओन फाबियो मारिन मोन्काडाका अनुसार गाउँमा कुनै मानवीय क्षति वा घाइते भएको खबर आएको छैन। यद्यपि, गाउँ प्रवेश गर्ने र बाहिरिने सडकहरूमा क्षति पुगेको छ।
कोलम्बियाको राजधानी सहरहरूको संघले सोमबार जारी गरेको पछिल्लो विवरणअनुसार भूकम्पमा ४८० भन्दा बढी मानिस घाइते भएका छन्।
भूकम्पको केन्द्रविन्दुबाट करिब ५५ किलोमिटर (३४ माइल) टाढा रहेको पेरेरिया सहरमा सबैभन्दा ठूलो क्षति भएको देखिएको छ।
भूकम्पका कारण सहरको मुख्य चोक प्लाजा बोलिभारमा कम्तीमा एउटा भवन भत्किएको देखिन्छ। भवन भत्किएपछि चोकमा भग्नावशेष र धुलो फैलिएको थियो, जहाँ त्यस समय धेरै मानिसहरू भेला भएका थिए।
स्थानीय अधिकारीहरूका अनुसार पेरेरियाको महानगरीय क्षेत्रमा कम्तीमा ४० जनाको मृत्यु भएको छ भने ६५ वटा भवन भत्किएका छन्। तीमध्ये १५ वटा भवनमा मानिसहरू पुरिएको आशंका गरिएको छ।
सहरका केही क्षेत्रमा मंगलबार स्थानीय समयअनुसार बिहान ५ बजेसम्म कर्फ्यु लागू गरिएको छ।
पेरेरियाबाट करिब १६० किलोमिटर दक्षिणमा र भूकम्पको केन्द्रविन्दुबाट करिब २०० किलोमिटर टाढा रहेको काली सहरमा पनि ३२ वटा भवन भत्किएका छन्। चोको तथा भाये देल काउका क्षेत्रका विभिन्न स्थानमा समेत भूकम्पबाट ठूलो क्षति भएको जनाइएको छ।
