काठमाडौं । राधी विद्युत् कम्पनी लिमिटेडले स्थगित भएको आफ्नो वार्षिक साधारण सभा पुनः आगामी पुस ३० गते गर्ने भएको छ । कम्पनी ऐन बमोजिम आवश्यक गणपूरक सङ्ख्या (कोरम) नपुगेपछि पूर्वनिर्धारित सभा स्थगित गरी नयाँ मिति तय गरिएको जनाएको छ ।
पुस २२ गते मङ्गलवार दिउँसो ४ बजे बसेको सञ्चालक समितिको बैठकले स्थगित साधारण सभा पुनः बोलाउने निर्णय गरेको हो। बैठकको निर्णय अनुसार अब कम्पनीको वार्षिक साधारण सभा पुस ३० गते बुधवार बिहान ८ बजे सञ्चालन हुनेछ।
कम्पनीले नेपाल धितोपत्र बोर्डलाई पठाएको पत्र अनुसार, आर्थिक वर्ष २०८१/८२ को वार्षिक साधारण सभा यसअघि पुस २२ गतेका लागि तय गरिएको थियो। तर, सो दिन कम्पनी ऐन २०६३ तथा कम्पनीको नियमावली बमोजिम सभा सञ्चालन गर्न आवश्यक सदस्यहरूको उपस्थिति नपुगेपछि सभा रोकिएको थियो ।
