काठमाडौं । नेपाली कांग्रेसका नेता गोविन्द भट्टराईले आफूले धेरैको विश्वास जित्न बाँकी रहेको भन्दै राजनीतिको बाँकी समय त्यसका लागि खर्चने बताएका छन् ।
उपसभापति खुलामा उम्मेदवार रहेका भट्टराईले पराजित भएपछि मतदातालाई धन्यवाद दिँदै पार्टीको जिम्मेवारी सम्हाल्न आफूलाई धेरैले विश्वास गरे पनि अझ धेरैको विश्वास जित्न आवश्यक रहेको बताए ।
‘१५ औँ महाधिवेशनमा ममाथि विश्वास गरेर मत प्रदान गर्नुहुने सम्पूर्ण महाधिवेशन प्रतिनिधि साथीहरुप्रति अनुग्रहित छु, उनले भने, ‘तपाईंको मात्र विश्वासले नपुगेर मलाई पार्टीको जिम्मेवारी सम्हाल्ने यात्रामा अझ धेरै साथीहरूको भरोसा जित्न आवश्यक रहेको यस मत परिणामले देखाएको छ ।’
आफूले लाभ र पदका लागि कहिल्यै राजनीति नगरेको र अहिलेसम्म पाएको कुरा विश्वास र माया नै रहेको उनले उल्लेख गरेका छन् ।
सामाजिक सञ्जालमार्फत कार्यकर्तालाई सम्बोधन गरेका भट्टराईले आगामी राजनीतिक यात्रामा भरोसा जित्न बाँकी धेरैहरूको भरोसा जित्नका लागि चेत, लगाव र समय खर्चने प्रतिबद्धता जनाएका छन् ।
नेविसंघका पूर्व अध्यक्ष रहिसकेका भट्टराई उपसभापति पदमा तेश्रो सर्वाधिक मत प्राप्त गरे पनि पराजित भए ।
