काठमाडौं । नेपाल कम्युनिष्ट पार्टी (एमाले)ले केपी शर्मा ओली एमाले अध्यक्ष तेहेरिने र पूर्वराष्ट्रपति विद्या भण्डारीलाई विधान महाधिवेशनमा रोक्नेगरी प्रस्ताव पारित गरेको छ ।
पार्टी अध्यक्ष एवं प्रधानमन्त्री ओलीको अध्यक्षतामा बिहीबार राति सम्पन्न पार्टी सचिवालय बैठकले ७० वर्षे उमेर हद र दुई कार्यकालको व्यवस्था हटाउने प्रस्ताव पारित गरेको छ । यससँगै उमेर हद र दुई कार्यकालको व्यवस्थाले ओलीलाई अध्यक्षमा रोक्न सक्ने प्रावधान हटेको छ । उमेर हद र दुई कार्यकालको व्यवस्था हटेसँगै उनी तेस्रोपटक अध्यक्ष बन्न सक्ने बाटो खुलेको हो ।
यसैगरी सदस्यता नवीकरण गरेर पार्टी राजनीतिमा सक्रिय भएकी पूर्वराष्ट्रपति भण्डारीलाई रोक्नेगरी प्रस्ताव पारित भएको छ । बैठकले दशौं राष्ट्रिय महाधिवेशनका प्रतिनिधिहरु मात्रै विधान महाधिवेशनको प्रतिनिधि बन्ने प्रस्ताव पारित गरेको छ । बैठकपछि उपमहासचिव ज्ञवालीले भने, ‘दशौं राष्ट्रिय महाधिवेशनमा नभएका र पछि केन्द्रीय कमिटी अथवा केन्द्रीय निकायमा आउनुभएका साथीहरु आयोजकका हिसाबले जानुहुन्छ, तर उहाँहरु विधान महाधिवेशनको प्रतिनिधि चाहिँ बन्नु हुन्न ।’
२०७८ मंसिरमा सम्पन्न एमालेको दशौँ महाधिवेशनमा भण्डारी एमाले प्रतिनिधि थिइनन् । उनी विसं. २०७२ कार्तिक ११ देखि २०७९ फागुन २८ गतेसम्म दुई कार्यकाल गरी नेपालको दोस्रो तथा प्रथम महिला राष्ट्रपतिको भूमिकामा थिइन् ।
