मुस्ताङ। स्याउ उत्पादनले प्रसिद्ध हिमाली जिल्ला मुस्ताङमा यस वर्ष स्याउ उत्पादन घटे पनि किसानको आम्दानी भने बढेको छ।
गत वर्षको तुलनामा यस वर्ष आठ दशमलव ९७ प्रतिशतले स्याउ उत्पादनमा ह्रास आए पनि गत वर्षको भन्दा यस वर्ष स्याउको बजारीकरणबाट १६ करोड ५३ लाख रुपैयाँ बढी आम्दानी बढेको कृषि तथा पशु विकास कार्यालयले जनाएको छ।
गत वर्ष उत्पादन भएको स्थानीय र हाइब्रिड स्याउ गरी फार्म गेट औसत मूल्य प्रतिकिलो १५५ रुपैयाँमा बिक्री भएकामा यस वर्ष प्रति किलो फार्म गेट मूल्य १८५ रुपैयाँमा बिक्री हुँदा स्याउ बिक्रीबाट आम्दानी बढेको कृषि तथा पशु विकास कार्यालयका प्रमुख राजेश गुरुङले जानकारी दिए।
उनका अनुसार गत वर्षको स्याउको फार्म गेट मूल्यमा प्रतिकिलो ३० रुपैयाँले वृद्धि भएको हो। गत वर्ष मुस्ताङमा सात हजार ३२८ मेट्रिक टन स्याउ उत्पादन भएकामा यस वर्ष छ हजार ६८४ मेट्रिक टन स्याउ उत्पादन भएको छ। केन्द्रका अनुसार गत वर्षको तुलनामा यस वर्ष ६४४ मेट्रिक टन स्याउ कम फलेको हो।
मुस्ताङमा गत वर्षको तुलनामा स्याउ उत्पादन दर घटे पनि उच्च घनत्व प्रविधिमा आधारित (हाइब्रिड) स्याउको उत्पादनमा भने कुनै असर नपुगेको कार्यालय प्रमुख गुरुङको भनाइ छ। गत वर्ष स्थानीय जातको स्याउ छ हजार ७८ मेट्रिक टन र हाइब्रिड स्याउ एक हजार २५० मेट्रिक टन उत्पादन भएको थियो।
यस वर्ष स्थानीय जातको स्याउ पाँच हजार २५९ मेट्रिक टन र हाइब्रिड स्याउ एक हजार ४२४ मेट्रिक टन उत्पादन भएको छ। गत वर्षको तुलनामा यस वर्ष स्थानीय स्याउमा ८१९ मेट्रिक टन कम फलेको छ भने हाइब्रिड स्याउ १७४ मेट्रिक टन बढी फलेको कार्यालय प्रमुख गुरुङको भनाइ छ।
मुस्ताङमा यस वर्ष उत्पादन भएको ९० प्रतिशत स्याउ जिल्लाबाहिर निर्यात हुँदा ९९ करोड २१ लाख ३३ हजार रुपैयाँ आम्दानी भएको जनाइएको छ। गत वर्ष ९० प्रतिशत स्याउ जिल्ला बाहिर निर्यात हुँदा ८२ करोड ६८ लाख रुपैयाँ आम्दानी भएको थियो।
गत वर्ष स्थानीय स्याउ निर्यात हुँदा ६० करोड १८ लाख रुपैयाँ आम्दानी भएको थियो भने हाइब्रिड स्याउ निर्यात हुँदा २२ करोड २५ लाख पाँच हजार रुपैयाँ आम्दानी भएको थियो। यस वर्ष स्थानीय जातको स्याउ निर्यात गर्दा ७१ करोड ७३ हजार रुपैयाँ आम्दानी भएको थियो। कार्यालयको स्याउ तथ्याङ्कअनुसार गत वर्षभन्दा यस वर्ष स्थानीय स्याउ बिक्रीबाट १० करोड ८२ लाख रुपैयाँ र हाइब्रिड स्याउ बिक्रीबाट पाँच करोड ९५ लाख रुपैयाँ वृद्धि भएको छ।
मुस्ताङमा बर्सेनि कृषि तथा पशु विकास कार्यालय, राष्ट्रिय कृषि आधुनिकीकरण परियोजना एकाइ, शीतोष्ण बागवानी विकास केन्द्र मार्फा र सम्बन्धित स्थानीय तहका कृषि प्राविधिकलगायतको समन्वयमा माथिल्लो मुस्ताङ, मध्य मुस्ताङ र तल्लो मुस्ताङ क्षेत्रमा तीन भागमा विभाजन गरी स्याउको क्रप कटिङ विधिबाट धेरै फल्ने, मध्यम फल्ने र कम फल्ने स्याउ बगैँचाको उत्पादन लेखाजोखा गरिएको आधारमा उत्पादन र आम्दानी अनुमान गरिएको कार्यालय प्रमुख गुरुङले जानकारी दिए।
उनका अनुसार मुस्ताङमा उत्पादन भएको स्याउ ९० प्रतिशत जिल्लाबाहिर निर्यात भएको र १० प्रतिशत स्याउ जिल्लाभित्र भण्डारण र खपत भएको छ। मुस्ताङका पाँच स्थानीय तहमा गरी कुल ८९९ हेक्टर क्षेत्रफलमा स्याउखेती विस्तार गरिएकोमध्ये ६२७ हेक्टर क्षेत्रफलमा लगाइएको स्याउ बोटले उत्पादन दिने गरेको छ।
त्यसमध्ये स्थानीय स्याउको क्षेत्र ८३७ हेक्टरमध्ये ५७२ हेक्टरमा लगाइएको स्याउ बोटले उत्पादन दिने गरेको छ। यसैगरी ६२ हेक्टर क्षेत्रफलमा लगाइएको उच्च घनत्व प्रविधिमा आधारित (हाइब्रिड) स्याउ बगैँचामध्ये ५५ हेक्टर क्षेत्रफलमा लगाएको स्याउले उत्पादन दिने गरेको कृषि तथा पशु विकास कार्यालयले जनाएको छ।
मुस्ताङमा गत वर्षको तुलनामा यस वर्ष स्थानीयतर्फ सात हेक्टर र हाइब्रिडतर्फ दुई हेक्टर क्षेत्रफल विस्तार भएको थियो। एक दशमलव शून्य छ प्रतिशतले स्थानीय स्याउ र १० प्रतिशतले हाइब्रिड स्याउको उत्पादनशील क्षेत्र विस्तार भएको कार्यालयले जनाएको छ।
गत वर्ष प्रतिहेक्टर उत्पादकत्व स्थानीय १० दशमलव ७४ मेट्रिक टन रहेकामा यस वर्ष घटेर प्रति हेक्टर उत्पादकत्व नौ दशमलव १९ प्रतिशत छ। यसैगरी गत वर्ष हाइब्रिड स्याउ प्रतिहेक्टर उत्पादकत्व २५ मेट्रिकटन रहेकोमा यस वर्ष २५ दशमलव ९० मेट्रिक टन प्रतिहेक्टर उत्पादकत्व रहेको कार्यालय प्रमुख गुरुङले जानकारी दिए।
मुस्ताङका स्याउ किसानले स्थानीय जातका स्याउमा रेड डेलिसियस, रोयल डेलिसियस, गोल्डेन डेलिसियस, रिचारेड डेलिसियस र फुजी स्याउ उत्पादन गर्छन्। उच्च घनत्व प्रविधिको हाइब्रिड स्याउतर्फ गाला, रेड डेलिसियस, किङरोट, जोना प्रिन्सलगायतका स्याउ उत्पादन हुने गरेको छ।
