विराटनगर । झापाको कमल गाउँपालिकामा बेवारिसे अवस्थामा एउटा हतियार फेला परेको छ ।
गत भदौ २४ गतेको जेनजी आन्दोलनका क्रममा प्रहरीबाट लुटिएको ‘ग्यासगन’ आइतबार बिहान गेउरीय खोलाको किनारमा फेला परेको हो ।
जिल्ला प्रहरी कार्यालय झापाका अनुसार, आइतबार बिहान साढे ६ बजेको समयमा कमल गाउँपालिका–५ स्थित धन प्रसाद मार्ग नजिकै रहेको गेउरीय खोला किनारमा हतियार रहेको विशेष सूचना प्राप्त भएको थियो ।
सोही सूचनाका आधारमा इलाका प्रहरी कार्यालय दमकबाट खटिएको प्रहरी टोलीले खानतलासी गरेर हतियार नियन्त्रणमा लिएको हो ।
प्रहरीले २३८१६९ नम्बरको एक थान ग्यासगन फेला पारेको हो । फेला परेको हतियारको बट र नाल जलेको तथा खिया लागेको अवस्थामा रहेको प्रहरीले जनाएको छ ।
प्रहरीको प्रारम्भिक अभिलेख अनुसार उक्त हतियार गत भदौ २४ गते जेनजी आन्दोलनका क्रममा प्रदर्शनकारीले लुटेका थिए । इलाका प्रहरी कार्यालय दमकबाट खटिएको टोलीबाट आन्दोलनकारीले उक्त ग्यासगन खोसेर लगेका थिए ।
हतियार कसले र कुन उद्देश्यले त्यहाँ छाडेको हो भन्नेबारे थप अनुसन्धान भइरहेको प्रहरीले जनाएको छ ।
