काठमाडौं । प्रतिनिधिसभामा विचाराधीन खानी तथा खनिज पदार्थ विधेयक र राहदानी (पहिलो संशोधन) विधेयक, २०८३ मा उल्लेख्य संख्यामा संशोधन प्रस्ताव दर्ता भएका छन्।
संघीय संसद् सचिवालयका अनुसार खानी तथा खनिज पदार्थ विधेयकमा ३५ वटा र राहदानी (पहिलो संशोधन) विधेयकमा १७ वटा संशोधन प्रस्ताव दर्ता भएका छन्।
दर्ता भएका संशोधन प्रस्तावहरू एकल तथा समूहगत रूपमा आएका छन्। संसद् सचिवालयले प्राप्त प्रस्तावहरूलाई एकीकृत गर्ने प्रक्रिया अघि बढाइरहेको जनाएको छ।
संघीय संसद् सचिवालयको विधेयक शाखा (प्रतिनिधिसभा) का शाखा अधिकृत जयराम खड्काका अनुसार संशोधन प्रस्तावहरूलाई एकीकृत गरी आवश्यक प्रक्रिया पूरा गरेपछि मात्रै सम्बन्धित समितिमा छलफलका लागि अघि बढाइनेछ।
उनका अनुसार प्रस्तावहरू स्वीकृत गरी प्रक्रिया पूरा गर्न केही समय लाग्नेछ। एकल वा समूहगत रूपमा प्राप्त संशोधन प्रस्तावलाई व्यवस्थित गरी विधेयकमाथिको छलफललाई अघि बढाउने तयारी भइरहेको छ।
खानी तथा खनिज पदार्थ विधेयकमा परेको संशोधनको संख्या राहदानी विधेयकको तुलनामा दोब्बरभन्दा बढी छ। अब दुवै विधेयकमाथि दर्ता भएका संशोधन प्रस्तावलाई समेटेर थप छलफल अघि बढाइनेछ।
