काठमाडौं । अमेरिकाको फ्लोरिडा राज्यस्थित पाल्म बिच काउन्टीको रिहायशी (बस्ती) क्षेत्रमा आइतबार दिउँसो एक लियरजेट ) निजी विमान दुर्घटना हुँदा त्यसमा सवार सबै ९ जनाको मृत्यु भएको छ। अमेरिकी यातायात अधिकारीहरूले घटनाको पुष्टि गरेका छन्।
फेडेरल एभिएसन एडमिनिस्ट्रेशन (FAA) ले जारी गरेको वक्तव्य अनुसार, टेक्ससको अस्टिन-बर्गस्ट्रोम अन्तर्राष्ट्रिय विमानस्थलबाट उडान भरेको उक्त निजी जेट बहामासको नर्थ एलिउथेरा विमानस्थलतर्फ जाँदै थियो।
सामाजिक सञ्जालमा सार्वजनिक भएका भिडियोहरूमा विमान सडक नजिकै तीव्र गतिमा जमिनमा जोतिन पुगेको र भीषण विस्फोट भएको देखिएको छ।
“यो एक ठूलो त्रासदीपूर्ण घटना हो,” दुर्घटनास्थल नजिकै लेक वर्थ बिचमा आयोजित पत्रकार सम्मेलनमा फ्लोरिडाका गभर्नर रोन डिसेन्टिसले भने, “भिडियो हेर्दा यो निकै कहालीलाग्दो छ। मिसाइल बज्रिएजस्तै गरी ठूलो विस्फोट भयो र विमानका टुक्राहरू जताततै छरिए।”
राष्ट्रिय यातायात सुरक्षा बोर्डले दुर्घटनाको अनुसन्धान सुरु गरिसकेको जनाएको छ। अमेरिकी यातायात मन्त्री सिन डफीले यस घटनालाई “अत्यन्तै भयानक त्रासदी” भनेका छन्।
एफएएको अभिलेख अनुसार बोम्बार्डियर कम्पनीद्वारा निर्मित उक्त लियरजेट ६० विमानको स्वामित्व डेलावेयरको एक कर्पोरेसनसँग रहेको छ। क्यानडास्थित बोम्बार्डियर कम्पनीले अनुसन्धानमा पूर्ण सहयोग र समन्वय गर्ने प्रतिबद्धता जनाएको छ।
विमान दुर्घटनाका कारण मोबाइल होम पार्कको प्रवेशद्वार नजिकै सडक छेउमा ठूलो खाल्डो (क्रेटर) बनेको पाल्म बिच काउन्टीका आयुक्त जोएल फ्लोरेसले पत्रकार सम्मेलनमा बताए। सुरक्षाका कारण सो क्षेत्रका करिब ६०० जना बासिन्दालाई स्थानान्तरण गरी काउन्टीका दुईवटा आश्रयस्थलमा राखिएको फ्लोरेसले जानकारी दिए।
मौसम पूर्वानुमान संस्था ‘एक्युवेदर’ का अनुसार दुर्घटनाको समयमा सो क्षेत्रमा तीव्र वर्षा र मेघगर्जनसहितको आँधीबेहरी आइरहेको थियो। विमान नियन्त्रण सञ्चार प्रसारण गर्ने वेबसाइट ‘लाइभ एटिसी’ पोस्ट गरिएको मियामी एयर ट्राफिक कन्ट्रोल सेन्टरको अडियो रेकर्डिङमा दुर्घटनाअघिका अन्तिम क्षणहरू सुन्न सकिन्छ।
सुरुमा ककपिटबाट चालकले एयर ट्राफिक कन्ट्रोलरलाई आफूहरू “बर्फको सामना गरिरहेको” तर “मध्यम खालको तुफान/हावाको धक्का ” महसुस भएकाले सुरक्षित उडानको मार्ग खोजिरहेको बताएका थिए।
त्यसको एक मिनेटभन्दा पनि कम समयमा, चालकले “मेडे, मेडे भन्दै विमान अकस्मात् प्रतिमिनेट १०,००० फिटको दरले तल खसिरहेको बताए।
केही सेकेन्डपछि, प्रतिमिनेट २०,००० फिटको दरले विमान तल खस्न थालेपछि उनले आपत्कालीन अवस्था को घोषणा गरे।
त्यसको २० सेकेन्डभन्दा कम समयमै, विमान कोल्टिन थालेको र प्रतिमिनेट २२,००० फिटको दरले तल झरेपछि ककपिटबाट चालकले “हामी जमिनमा ठोक्किन लाग्यौँ” भनेका थिए।
पहिलो ‘मेडे’ घोषणाको करिब ३५ सेकेन्डपछि ककपिटबाट सुनिएको अन्तिम शब्द थियो— “हामीसँग अब समय सकियो” । उडान ट्र्याकिङ वेबसाइट ‘फ्लाइटराडार२४’ का अनुसार तथ्याङ्कले विमान एक पटक प्रतिमिनेट ३२,००० फिटभन्दा पनि तीव्र गतिमा तल खसेको देखाएको छ।
एजेन्सी
