काठमाडौं । रसुवास्थित भोटेकोशी नदीमा आएको बाढीबाट प्रभावित नागरिकको उद्धार कार्य तीव्र पारिएको छ। नेपाली सेनाका अनुसार हालसम्म १२ जनाको हेलिकोप्टरमार्फत उद्धार गरिएको छ।

सेनाका अनुसार स्याफ्रुबेँसीबाट ६ जना, मैलुङबाट २ जना र धुन्चेबाट ४ जना गरी १२ जनाको उद्धार गरिएको हो।

बाढी प्रभावित क्षेत्रमा उद्धार कार्यका लागि नेपाली सेनाका ४ वटा र निजी कम्पनीका ८ वटा गरी कुल १२ वटा हेलिकोप्टर परिचालन गरिएको सेनाले जनाएको छ। जोखिममा रहेका नागरिकको खोजी तथा उद्धार कार्यलाई निरन्तरता दिइएको छ।

यसैबीच, नेपाली सेनाको मेडिकल टोलीले त्रिशूलीस्थित नं. १ सैन्य तालिम केन्द्रमा आकस्मिक उपचार सेवा प्रदान गरिरहेको छ। उद्धार गरिएका तथा बाढीबाट प्रभावित नागरिकलाई आवश्यक स्वास्थ्य सेवा उपलब्ध गराउन मेडिकल टोली परिचालन गरिएको सेनाले जनाएको छ।

भोटेकोशीमा आएको बाढीका कारण रसुवाका विभिन्न क्षेत्रमा जोखिम बढेपछि नेपाली सेनासहित सुरक्षा निकायहरू उद्धार तथा राहत कार्यमा सक्रिय रहेका छन्।